Seo cúrsa nua atá á thairiscint ag Ionad na dTeangacha, Ollscoil na hÉireann Má Nuad. Tá sé bunaithe ar an gcúrsa Teastas i Múineadh na Gaeilge a bhí á reáchtáil ag an Ollscoil le 5 bliana anuas. Bunaithe ar an gcúrsa teastais seo, agus ar thaighde ar an dea-chleachtas Eorpach agus idirnáisiúnta, tá Dioplóma nua Ollscoile á thairiscint ó mhí Mheán Fómhair 2012. Tá an Dioplóma á thairiscint le tacaíocht ó Fhoras na Gaeilge.

Cuirfear béim láidir sa Dioplóma ar an gcleachtadh teagaisc sa seomra ranga. Beidh béim ar an  bhféin-anailís, ar an bpiar-mheasunú agus ar thacaíocht phraiticiúil don mhúinteoir.

Feidhmeanna an chúrsa

• Oiliúint a chur ar fáil do rannpháirtithe maidir le conas Gaeilge a mhúineadh d’fhoghlaimeoirí fásta.
• Cur le scileanna teagaisc na rannpháirtithe.
• Cur le heolas na rannpháirtithe ar an taighde is deireanaí a rachadh chun tairbhe dóibh i múineadh na Gaeilge d’fhoghlaimeoirí fásta.
• Deis a thabhairt do rannpháirtithe smaointe, moltaí praiticiúla agus tuairimí a mhalartú.

Struchtúr

• Beidh ar rannpháirtithe freastal ar 10 gceardlann oiliúna in Ollscoil na hÉireann Má Nuad. Beidh na ceardlanna ar siúl ar Shathairn idir mí Mheán Fómhair 2012 agus mí an Aibreáin 2013.
• Beidh ar rannpháirtithe 40 uair an chloig teagaisc a dhéanamh i rith thréimhse an chúrsa. Is faoi na rannpháirtithe féin an teagasc seo a eagrú.
• Beidh obair cúrsa le cur i gcrích – obair leanúnach agus tionscadail a bheidh bunaithe ar an gcleachtas sa seomra ranga agus ar na ceardlanna.
• Is dioplóma ollscoile é seo a bhfuil 40 pointe creidmheasa ag dul leis.

Modúl 1

Múineadh na Gaeilge d’fhoghlaimeoirí fásta: teoiricí agus dea-chleachtas

(10 pointe creidmheasa) 20%

Modúl 2

Cleachtadh teagaisc

(20 pointe creidmheasa) 60%

Modúl 3

Teoiric agus cleachtas – fillteán teagaisc

(5 phointe creidmheasa) 10%

Modúl 4

An teagasc machnamhach – dhá thionscnamh

(5 phointe creidmheasa) 10%

Ábhar an Chúrsa

Achoimre Freastal agus teagasc 10 gceardlann oiliúna 40 uair an chloig teagaisc Obair an chúrsa Fillteán teagaisc Tionscnamh 1 (an teagasc machnamhach 1) Tionscnamh 2 (an teagasc machnamhach 2)

Ceardlanna

Beidh ar rannpháirtithe freastal ar 10 gceardlann i rith thréimhse an chúrsa. Déanfar cur i láthair sna ceardlanna ar ábhar an chúrsa. Beidh na ceardlanna ar siúl ar Shatharn ó 9.30 a.m. – 4.30 p.m. Beidh béim láidir ar an idirghníomhaíocht sna ceardlanna agus tabharfar deis do rannpháirtithe smaointe a roinnt agus tuairimí a mhalartú.

Bainfear úsáid as taifeadtaí na múinteoirí féin den seomra ranga chun cur leis an bplé sna ceardlanna agus cuirfear deiseanna ar fáil do mhúinteoirí comhairle na rannpháirtithe eile a lorg maidir le gnéithe ar leith dá gcuid teagaisc.

Cleachtadh Teagaisc

Beidh ar rannpháirtithe an chúrsa 40 uair an chloig teagaisc a dhéanamh le linn an chúrsa. Is faoi na rannpháirtithe féin atá sé an cleachtadh teagaisc sin a eagrú.  

Fillteán Teagaisc

Beidh ag gach rannpháirtí fillteán teagaisc a choinneáil le linn an chúrsa. Obair leanúnach atá i gceist leis an bhfillteán seo agus beidh sé bunaithe ar na ceardlanna, ar an bpleanáil ranga agus ar an bhféin-anailís ar an teagasc.

Tionscnaimh (an teagasc machnamhach)

Beidh dhá thionscnamh le déanamh ag rannpháirtithe le linn thréimhse an chúrsa. Beidh na tionscnaimh seo bunaithe ar an anailís a dhéanfaidh siad ar a gcuid teagaisc.

Critéir iontrála

Chun áit a fháil ar an gcúrsa beidh ar iarrthóirí (i) caighdeán sásúil Gaeilge a léiriú; (ii) agallamh a dhéanamh.  

Beidh ar iarrthóirí scrúdú B2 (nó os a chionn) de Theastas Eorpach na Gaeilge a bhaint amach. Beidh ar a laghad 70% ag teastáil i ngach scil. Cuirfear scrúdú ag leibhéal B2 ar iarrthóirí san Ollscoil ar an Satharn 30 Meitheamh. Beidh ar gach iarrthóir freastal ar an scrúdú seo. Beidh an t-agallamh ar siúl an lá céanna.

Próiseas Iarratais

Is féidir teacht ar fhoirm iarratais anseo.

Dátaí tábhachtacha

Dáta deiridh iarratais                          1 Meitheamh

Scéala faoi agallamh                           15 Meitheamh

Scrúdú iontrála agus agallamh            30 Meitheamh

Dátaí na gceardlann (2012)

• 15 Meán Fómhair
• 29 Mean Fómhair
• 20 Deireadh Fómhair
• 10 Samhain
• 8 Nollaig

Beidh 5 cheardlann eile ar siúl idir Eanáir agus Aibreán 2013.

Táille

Tá an cúrsa seo á chur ar fáil le tacaíocht ó Fhoras na Gaeilge. Beidh an cúrsa saor in aisce dóibh siúd a shásaíonn na critéir iontrála agus n-éiríonn leo áit a fháil ar an gcúrsa. Beidh táille €200 le híoc chun clárú don chúrsa ach déanfar an táille seo a aisíoc ar chríochnú an chúrsa go sásúil.

Tuilleadh eolais

ailin.nichonchuir@nuim.ie

(086) 401-5318