Ar thaitin an Ghaeilge leat ar scoil?  An bhfuil tú buartha go bhfuil do chuid Gaeilge ag dul i léig?  Ar mhaith leat cáilíocht fhoirmiúil a fháil sa Ghaeilge cé go bhfuil cúrsa eolaíochta nó dlí nó gnó ar bun agat? 

Tá an Dioplóma sa Ghaeilge á thairiscint den chéad uair i mbliana do mhic léinn lánaimseartha Ollscoil na hÉireann Má Nuad.  Más mac léinn tú i mBliain 2 nó i mBliain 3 in Ollscoil na hÉireann Má Nuad ar mhaith leat do chuid scileanna cumarsáide Gaeilge a athnuachan agus a fheabhsú, beidh an cúrsa seo oiriúnach duit. 

Is cúrsa páirtaimseartha é seo thar dhá bhliain acadúil, rang amháin trí huaire an chloig in aghaidh na seachtaine ina ndéantar scileanna teanga a dhaingniú agus a bhuanú.  Chomh maith leis sin, bíonn trí cheardlann dírithe ar ghnéithe de shaol agus de chultúr na Gaeilge ar siúl i rith na bliana chomh maith le turas chun na Gaeltachta i mí an Mhárta. 

Glactar le Dioplóma sa Ghaeilge ó OÉ Má Nuad in áit onóracha ag an Ardleibhéal sa Ghaeilge san Ardteistiméireacht mar riachtanas iontrála don Chúrsa Iarchéime sa Bhunmhúinteoireacht. 

Riachtanais iontrála

Caighdeán maith Gaeilge idir labhairt agus scríobh.  Caithfidh iarrthóirí pas a bheith acu san Ardteistiméireacht (ardleibhéal) nó a chomhionann.  Sa chás go mbíonn níos mó na 20 iarrthóir, cuirfidh Ionad na dteangacha agallaimh ar bun chun rannpháirtithe a roghnú. 

Líon na n-áiteanna ar an gcúrsa:  20

Táille speisialta do mhic léinn:  €75 in aghaidh na bliana

Líon isteach an fhoirm iarratais agus fág isteach in oifigí Ionad na dTeangacha é roimh Déardaoin 16 Meán Fómhair 2010.

Teagmháil

teanga@nuim.ie

01 708 6417